मण्डली भित्रको जबाफदेहीता – अनिवार्य आत्मिक अभ्यास!
पापले आफ्नो शक्ति गोप्यतामा प्रदर्शन
गर्दछ। दुष्ट शैतानले हामीलाई हामीले कसैसँग जबाफ देही हुनु नपर्ने गरी गुप्तमा
गरेका कामहरूमा नै फसाँएर प्रभुबाट टाढा राख्ने प्रयास गरेको हुन्छ। एक्लै हुँदा
मानिस आफ्नो नैतिकता तथा विश्वासबाट बहकिन सक्छ। यसको ज्वलन्त उदाहरण राजा दाऊदले आफू
एक्लै हुँदा बतशेबासँग गरेको पापबाट देखिन्छ। दाऊद मानिसहरूको साथमा हुँदा यस्तो
पाप गरेको देखिएन तर उनि उत्कृष्ट व्यक्तिको
रूपमा चिनिएका थिए । जब उनि एक्लै दरबारमा थिए, त्यस बेला उनले त्यस जघन्य अपराध
गर्न पुगे। परमेश्वरले मानिसको यस कमजोरी जान्नुभएको कारण हामीलाई एक्लो होइन तर सामूहिक
रूपमा आफ्नो विश्वासको अभ्यास गर्न बोलाउनु भएको हो।
ईसाई जीवन एक्लो एक्लै हिँड्नको लागि होइन
तर एक अर्का प्रति जबाफदेही रहँदै जिउन सकौं भनेर परमेश्वरले हामीलाई मण्डलीको एक
अङ्गको रूपमा बोलाउनुभएको हो। मण्डलीमा हामी एक अर्काको सहयोगी हुन्छौं । हाम्रो आत्मिक जागृतिको लागि एक अर्कालाई
प्रोत्साहन दिन तथा दह्रिलो पार्न सक्छौं
(1 थेसलोनिकी 5:11, हिब्रू 10:24)। हामी
जति नै एक अर्काको सहायक हुन्छौं हामी त्यति नै बलियो हुन्छौं र दुष्टले हामीलाई
हराउन सक्दैन।
उपदेशक 4:9-12
'एकभन्दा दुई
असल हो, किनभने तिनिहरूले आफ्नो कामको असल फल पाउनेछन्। यदि
एउटा लोट्यो भने त्यसको मित्रले त्यसलाई उठाउन सहायता गर्छ। तर लोट्दा पनि उठाउने कोही
साथी नहुने बिचरा! त्यस्तै यदि दुई जना सँगै सुते भने ती न्याना हुन्छन्, तर एकलै त कसरी न्यानो हुने? एक जनालाई कसैले जित्ला,
तर दुई जनाले त आफ्ना सुरक्षा गर्न सक्छन्। तीन सूतले बाटेको डोरी चाँडै
चुँडिँदैन। '
दृष्टान्त: एक पटक एउटा घोडाले ८,००० पाउन्डको
बोझलाई एक्लै तानेर उत्कृष्ट ठहरिएको थियो। त्यस्तै दोस्रो भएको घोडाले ७,००० पाउन्ड
तान्न सफल भएको थियो। तर यी दुई घोडाहरूलाई सँगै एउटै बोझलाई तान्न लगाउँदा उनीहरूले
एकसाथ ३०,००० पाउन्ड सम्म तान्न सकेका थिए। यसले सँगै बोझ उचाल्ने प्रयास गर्दाको शक्तिलाई
देखाउँछ।
हामी विश्वासी पनि जति एक अर्काको आत्मिक
बोझ उचाल्न सहायता गर्छौं त्यति नै सजिलै सैतानका युक्तिहरूलाई जित्न सक्छौं भन्ने
थाहा गर्छौं।
मण्डली यस्तो समाज हो जहाँ हामी एक अर्काको
सामु गवाही हुन बोलाइएका छौं। एक अर्कालाई असल उदाहरण देखाउनु हाम्रो दायित्व हो।
यसरी हामीले संसारको सामु पनि गवाही बन्न सक्छौं। मण्डलीका विश्वासीहरूको नैतिकताका
नै प्रश्न उठेको अवस्थामा हामी संसारमा कुनै पनि हालतमा असल गवाही दिन
सक्दैनौं। जसै विश्वासी मण्डलीको सामु जबाफदेही
भएर असल हुन्छ, त्यसरी नै विश्वासीको नैतिकता र गवाही पनि बढ्दै जान्छ।
मण्डलीका सबै सदस्यहरू, अगुवा तथा साधारण
विश्वासी सबैले एक अर्का प्रति जबाफदेहीता कायम गरेर हामीले आफ्नो गवाही र नैतिकता
बलियो पार्नु पर्दछ। कति पटक मण्डलीका अगुवाहरू तथा विश्वासीहरूको गोप्य अनैतिकता
बाहिर आएर सम्पूर्ण ईसाई समाजको गवाही बिगारेका घटनाहरू पनि छन्। मण्डलीमा देखा
परेका आर्थिक हिनामिनाका घटनाहरू पनि यसरी अरू प्रति जबाफदेही नभइ एक्लै चल्ने
गरेको कारण यस्ता घटनाहरू घटेका हुन्। हितोपदेश 18:1मा लेखिएको छ, 'अमिल्दो मानिस स्वार्थको पछि लाग्छ, त्यसले सबै उचित
ठहरको खुला विरोध गर्छ।' यस पदका अनुसार यदि हामी अरूसँग
मिल्न चाहँदैनौ र एक्लै हिँड्न खोज्छौं भने हामी अरूबाट केही लुकाउँदै या एक्लै
आफ्नो स्वार्थ पूर्ति तर्फ लागेका छौं । हामीलाई अरूबाट केही लुकाउनु छैन र शुद्ध
परमेश्वरको कार्य अगाडि बढाउँदै छौं भने, अरूबाट अलग हुनु र एक्लै अघि बढ्नु
आवश्यक हुँदैन। यस्तो आत्मिक दुर्घटनाबाट हामी आफूलाई र अरूलाई पनि बचाउन हामीले
एक अर्का प्रति जबाफदेहीताको दायरामा राख्नु अति महत्वपूर्ण हुन् आउँछ।
एक अर्कालाई सुधार गर्नु र जबाफदेहीता कायम
गर्नु बाइबलले मण्डलीलाई दिएको एक जिम्मेवारी हो।
हामीले एक अर्का प्रतिको जबाफदेहीता खोजी गरेनौं भने परीक्षामा आफैलाई होमी
रहेका हुन्छौं। मलाइ अरूको मतलब छैन भनेर एक्लै हिँड्न खोज्नु परमेश्वरको सामु
आफूलाई मूर्ख साबित गर्नु हो ।
गलाती 6:1-4
'भाइ हो,
यदि कुनै मानिस अपराधमा पक्राउ पर्यो भने तिमीहरू जो आत्मिक छौ,
तिमीहरूले नै नम्रतापूर्वक तिनको सुधार गर। आफ्नै पनि विचार राख,
नत्रता तिमीहरू पनि परीक्षामा पर्नेछौ। एउटाले अर्काको भार उठाओ,
र यसरी ख्रीष्टको व्यवस्था पूरा गर। किनकि कुनै मूल्य नभएको मानिसले
आफैलाई केही हुँ भनी ठान्छ भने त्यसले आफैलाई धोका दिन्छ। प्रत्येकले आफ्नै कामको
जाँच गरोस्, तब मात्र त्यसले आफैलाई अरूसँग तुलना नगरी आफैमाथि
गर्व गर्न सक्छ।'
