जाँड रक्सीको विषयमा बाइबलको शिक्षा
Bible Teaching on Alcohol Consumption
मण्डलीको अगुवा तथा विश्वासीहरूले बारम्बार सामना गर्नु पर्ने प्रश्नहरू-
- के बाइबलमा जाँड रक्सी खानुलाई पाप भनेको छ?
- के एक विश्वासीले जाँड रक्सी खाइनुहुन्छ?
- एउटा ईसाई विश्वासीले जाँड रक्सि किन खानु हुँदैन?
- जाँड रक्सी खाने विश्वासीलाई मण्डलीले के गर्ने?
जाँड रक्सी खाने विषय ईसाई समाजमा लामो समय देखी बहसमा आएको विषय हो। परमेश्वरको वचनले जाँड रक्सीले नमात्तिनु भन्ने सन्देश दिए पनि प्रस्टरूपमा जाँड-रक्सी पाप नै हो भनेर उल्लेख गरेको पाइँदैन। तर पनि बाइबलमा हामीले जाँड रक्सीबाट परै बस्नु परमेश्वरको इच्छा तथा चाहना हो भनेर बुझ्नु अति महत्वपूर्ण हुन्छ। निम्न बाइबलका खण्डहरूलाइ अध्ययन तथा मनन् गर्यौ भने हामीले परमेश्वरको इच्छा अनुसारको मार्गमा हिँडाउन सहायता मिल्नेछ।
मद्यपान (जाँड रक्सी)को विरुद्ध बाइबलको शिक्षा-
जाँड रक्सीले हाम्रो पुरानो पापी जीवनको प्रतिनिधित्व गरेको हुन्छ। व्यभिचार, मूर्तिपूजा जस्तै घृणित काम मध्ये मद्यपान पनि हो।
१ पत्रुस 4:2-3'यसरी त्यसले आफ्नो जीवनको रहल समय फेरि मानिसको कुइच्छामा होइन, तर परमेश्वरको इच्छामा बिताउँछ। बितेका दिनमा अन्यजातिहरूले गरेझैँ तिमीहरूले व्यभिचार, कुवासना, मद्यपान, मोजमज्जा, पियक्कड़पन र घृणित मूर्तिपूजामा प्रशस्त समय बितायौ। 'रोमी 13:13 'दिउँसोजस्तै गरी हामी ठीकसँग चलौं। मोजमज्जामा, पियक्कडपनमा, व्यभिचारमा, भ्रष्टाचारमा, झगड़ामा र डाहमा होइन। '
जाँड रक्सी खानु भनेको परमेश्वरको इच्छा अनुसार नचलेको जीवन हो। यसले हामीलाई परमेश्वरको चाहना भन्दा विपरीत बाटोमा डोर्याउँछ।
एफिसी 5:18 'दाखमद्यले नमात्तिओ, कारण त्यो विलासिता हो, तर पवित्र आत्माले भरिपूर्ण होओ। '
हितोपदेश 20:1 'दाखमद्य उपहास गर्ने हो, र मदिराचाहिँ कचिङ्गल मच्चाउने हो, यी कुराहरूको लतमा रुमलिनेहरू बुद्धिमान् हुँदैनन्। '
गलाती 5:19-21 'पापमय स्वभावका कामहरू प्रत्यक्ष छन्, जो यी नै हुन्— व्यभिचार, अपवित्रता, लम्पटपना, मूर्तिपूजा, मन्त्रतन्त्र, दुश्मनी, झैँझगड़ा, ईर्ष्या, क्रोध, स्वार्थीपन, फूट, गुटबन्दी, डाह, पियक्कड़पन, अश्लील मोजमज्जा र यस्तै अरू, जसका विषयमा म तिमीहरूलाई चेताउनी दिन्छु, र अघि पनि दिएकै हुँ। जस-जसले यस्ता कामहरू गर्दछन्, परमेश्वरका राज्यका हकदार बन्नेछैनन्। '
मद्यपानलाई पनि परमेश्वरको योजनामा सहभागी गराएको बाइबलको शिक्षा
येशूले पानीलाई दाखरसमा परिणत गराउनु भएको कारण यो परमेश्वरले चलाउँदै नचलाउने वस्तु होइन।
यूहन्ना 2:6-9 'अब यहूदीहरूको शुद्धि हुने प्रथाको निम्ति त्यहाँ प्राय: एक सय लिटर अटाउने ढुङ्गाका छ वटा घ्याम्पाहरू राखिएका थिए। येशूले तिनीहरूलाई भन्नुभयो, “घ्याम्पाहरू पानीले भर।” तिनीहरूले घ्याम्पाको मुखसम्मै पानी भरिदिए। उहाँले तिनीहरूलाई भन्नुभयो, “अलिकता उघाएर भोजका मुखियाकहाँ लैजाओ।” तिनीहरूले सो लगे। भोजका मुखियाले त्यो पानी चाखे, जो अब दाखमद्यमा परिणत भएको थियो। त्यो कहाँबाट आएको हो सो तिनलाई थाहा थिएन, तर पानी भर्ने चाकरहरूलाई भने थाहा थियो। '
दाखमद्य पनि किसानको परिश्रममा परमेश्वरले दिनुभएको आशिषको स्वरूपमा बाइबलमा दिइएको छ।
यशैया 62:8-9 'परमप्रभुले आफ्नो दाहिने हात र आफ्नो शक्तिशाली बाहुबलको शपथ खानुभएको छ, “म फेरि कहिल्यै तेरो अन्न तेरा शत्रुहरूलाई खान दिनेछैनँ, र जुन नयाँ दाखमद्यको निम्ति तैंले परिश्रम गरेको थिइस्, त्यो विदेशीले कहिल्यै खान पाउनेछैनन्। तर जसले अन्न कटनी गर्छन्, तिनीहरूले त्यो खानेछन्, र परमप्रभुको प्रशंसा गर्नेछन्। र जसले दाख जम्मा गर्छन्, तिनीहरूले मेरो पवित्रस्थानको चोकमा त्यो पिउनेछन्।” '
पावलले आफ्नो चेला तिमोथी जो मण्डलीको अगुवा पनि थिए उनैलाइ दवाइको रूपमा केहि दाखमद्य लिन सुझाब दिएका छन्।
१ तिमोथी 5:23 'अघिजस्तो पानी मात्र खाने नगर, तर तिम्रो पेटको लागि र घरीघरी बिरामी भएकोले गर्दा अलि-अलि दाखमद्य पिउने गर। '
विश्वासीले मद्यपानलाई उठाउनु भन्दा पहिले बिचार गर्नुपर्ने विषय
ख्रीष्टको विश्वासी हुनु भएको एक्लो जीवनयापन गर्नु मात्र नभइ उसको जीवन मण्डली जो ख्रीष्टको शरीर हो यसमा जोडिएको हुन्छ। त्यसैले कसैले पनि आफ्नो व्यक्तिगत चाहना, खुशीलाइ हेरेर खाने नखाने निर्णय गर्नु भन्दा पहिले यसले ख्रीष्टको मण्डलीको सामु कस्तो गवाही राख्छ भन्ने सोचेर शिक्षा दिनु आवश्यक हुन्छ। जस्तो पावलले तलको खण्डमा लेखेका छन्।
१ कोरिन्थी 10:31-32 'यसकारण चाहे तिमीहरू खाओ, अथवा पिओ, वा तिमीहरू जेसुकै गर, सबै परमेश्वरका महिमाको निम्ति गर। कसैलाई ठेस लाग्ने काम नगर, चाहे यहूदीलाई होस्, वा ग्रीकलाई होस्, वा परमेश्वरको मण्डलीलाई होस्। '
रोमी 14:15-22 'यदि तिमीले जे खान्छौ त्यस कुराले तिम्रो भाइलाई चोट पार्छ भने, तिमी प्रेममा चलेका हुँदैनौ। जुन भाइको निम्ति ख्रीष्ट मर्नुभयो, तिमीले खाएको कुराबाट उसको नाश नहोस्। यसैकारण तिमीलाई जे असल लाग्छ त्यसलाई अरूले खराब भन्न नदेओ। किनभने परमेश्वरको राज्य भनेको खानु र पिउनु होइन, तर पवित्र आत्मामा धार्मिकता, शान्ति र आनन्द हो। जसले यस किसिमले ख्रीष्टको सेवा गर्दछ, त्यो परमेश्वरलाई मन पर्ने र मानिसहरूबाट असल ठहरिएको हुन्छ। यसैले हामी ती कुराहरूको अनुसरण गरौं जसले शान्ति ल्याउँछ, अनि एउटाले अर्काको आत्मिक उन्नति गराउँछ। खानेकुराको खातिर परमेश्वरको कामलाई नष्ट नगर। वास्तवमा सबै कुरा शुद्ध छन्, तर आफूले खाएको कुराले अरूलाई बाधा पार्नु अनुचित हो। उचित त यो हुन्छ, कि मासु नखानु, मद्यपान नगर्नु, तथा कुनै यस्तो काम नगर्नु जसद्वारा तिम्रो भाइलाई बाधा हुन्छ। तिमीमा भएको विश्वास परमेश्वर र तिम्रो बीचमा राख। धन्यको हो त्यो मानिस, जसले आफूले उचित ठहराएका कुराको कारणले आफैलाई दोषी ठहराउनुपर्दैन।'
हामी ख्रीष्टको विश्वासी भएको कारण स्वविवेक पूर्वक व्यवहार गर्नु अति महत्वपूर्ण हुन्छ। जाँड रक्सिले ख्रीष्टको मण्डलीको गवाही तथा अन्य जाति तथा विश्वासीहरूको सामु गलत सन्देश दिने भएको कारण यसबाट अलग रहनु परमेश्वरको इच्छा हो।
